பார்வையற்ற தாய் பாடும் தாலாட்டு.

ஆரேஆரிரரோ ஆரேரே ஆரிராரோ
ஏலே இளங்கிளியே பாடி வரும்
பூங்குயிலின் தேனிசையே
பைந்தமிழின் தீஞ்சுவையே
நான் காணா காட்சியெலாம்
காண வந்த என் கண்ணே
செல்லமே கண்ணுறங்கு
யாழென்ன குழலென்ன உன்
குரலிசை போல வருமா?
கொஞ்சிடும் ரஞ்சிதமே
செல்லமே கண்ணுறங்கு
செவி தீண்டும் செந்தமிழின்
தீராத தேன்சுவையே
நான் காணா உயர்பொருளின்
பெண்ணுருவம் தான் நீயோ
தமிழின்பமே செல்லமே
நீ கண்ணுறங்கு……
கோடை குளிர்மழை தீண்டலே
தென்றல் சுமந்து வரும் பூமணமே
செல்லமே கால் அசைக்காதே
குலக்கொடியே கண்ணுறங்கு
கனிச்சாறின் நிறை சுவையே
திகட்டாத வைகாசி மாங்கனியே
குற்றால தென்றலே செல்லமே’
நீ கண்ணுறங்கு….
பாடல் பொதி பொருள்சுவையே
பண்ணிசைக்கும் கொலுசொலியே
செல்லமே நீ கண்ணுறங்கு..
நோன்பு பல நானிருந்து
ஈன்றெடுத்த வரமே
தமிழ் மொழியின் சுரமே
தமிழே அமுதே
சிறுமழைச் சாரலே
காலத்தில் விழித்தெழணும்
கண்ணுறங்கு கண்ணுறங்கு.

-கோ.லீலா.
கவிக்கோ அய்யா அவர்களுக்கு சமர்ப்பணம்.