=======================================
கவிக்கோவிற்கு வந்த
தவறான எண்ணிலிருந்தே
அழைப்பு………..
யாரெனக் கேட்டேன்.
அடுத்தமுனையில் ஆண்டவன்
என பதில் வந்தது………
கவிக்கோவிற்கு சொன்னது போல்
யாரை ஆண்டாய் என்றேன்?
உனை தேடுபவரை விடுத்து
இல்லை எனும் என்னிடம்
ஏன் வந்தாய் என்றேன்?
எது பிடிக்குமென்றது எதிர்முனை
மலை ,மழை,காடு,கடல்
காற்றும்வானம், பூமி, குழந்தை
யானை,ரயில் இன்னும் பல
சுருங்க சொல்லின்
இயற்கையென கொள்க என்றேன்.
மெல்ல நகைத்து
அதுவே நான் என்றது
எனின் இல்லாத ஒன்றுக்கு
பாலும் தேனும் ஊற்ற
பசிக்கழும் குழந்தையை
பார்த்திருப்பதென்ன என்றேன்
கேள்வி கணைகளை
ஏந்திக்கொள்ள அடுத்தமுனை
அமைதிக் காத்தது.
படைத்த யாவும்
சிறப்பாயிருக்க
சிந்திக்கும் மனிதனுக்குள்
தீயன நுழைத்தது ஏன்?
இயற்கையை அழிப்பவரை
வதம் செய்யாதது ஏன்?
என அடுக்கினேன் கேள்விகளை
மறுமுனை மௌனம் கலைத்து
சிறிதாய் செறுமியது
தீயன அழிக்க நீ
ஏன் வரவில்லையென்றேன்?
பதிலில்லை………..
நீ இருக்கிறாயா? இல்லையா?
என்றேன் சற்றே சந்தேகத்துடன்
ஹலோ ஹலோ என்று
சிக்னல் இல்லையென்றது….
சிட்டுக்குருவியொன்று
மாய்ந்து விழுந்தது………..
இப்போது மறுமுனை
வெறுமையாய் இருந்தது…
-லீலா.
