பறையொலி……

தமிழனின் இசைக்க ருவி பறை.அதை ஒழிக்கவும்,அதை குறியீடாகவும் பயன்படுத்துவதை கண்டித்து நான் எழுதிய கவிதை.

பறையொலி……
================
தகமித தரிகிட தகமித தரிகிட
தப்பாட்டம் இல்லையென….
கொட்டி முழக்கி பறையடி
தப்புகளை ஆட்டங்காண வைக்கும்
என்று சொல்லி பறையடி
ஆடிக்கொண்டே அடிப்பது
பறையொலி அறிவியல்
உள்ளமும் உடலும்
அசையும் ஒரு புள்ளியில்
ஆடவைக்கும் உயிரின் நாதம்
ஆதிதமிழன் இசையின் வேதம்
என்று சொல்லி பறையடி…
தப்பை தீயில் நீ வாட்டு
சாதி தீயை தூர ஓட்டு
கூட்டிசை உன் இசை
கூடியிசைப்பது என்னிசை
என்று சொல்லி பறையடி
சாவுக்கான இசைமட்டுமல்ல
வாழ்வுக்கும் இதே
என்று சொல்லி பறையடி
அந்நியனின் சூழ்ச்சியை
துரத்தி ஓட்ட பறையடி
வெறும் இசையல்ல
ஓர் இனத்தின் விசை
என்று சொல்லி பறையடி…
சதை வடிவமாய் வாழ்ந்த
உனக்கு இசை வடிவ
முற்றுப்புள்ளி தரும்
வாழ்வின் தத்துவம்
என்று சொல்லி பறையடி
மனசின் அழுக்கை போக்கும்
போருக்கும் முழங்கும் முரசு
என்று சொல்லி பறையடி…
உனை தாழ்வென்று சொல்பவனை
துரத்தியடிக்க பறையடி
ஆதிதமிழன் நீயென
அழுத்தி சொல்லி
கொட்டி முழக்கி பறையடி.
-லீலா.