பெண் எனும் பெரும் சக்தி.

பெண்ணழகை பேரழகை
சுற்றி வரும் கண்ணழகை
பாடி பாடி மாய்கின்றீர்
காமத்தின் முதல் படி வழியே
காதல் துய்த்து இறைமை
அடையாமல் அலைகின்றீர்
ஊருக்கே சேதி சொல்லும்
சாதி மல்லி வாசம் போல
அந்தரங்கத்து ஆசையெலாம்
அவையினிலே அவிழ்க்கின்றீர்
காதலென்ற மகத்துவத்தை
அங்க வர்ணிப்பால் அவமதிக்கின்றீர்
இலவச கழிப்பறை சுவர் தாங்கும்
மதியிழந்த மதிப்பற்ற சொற்களை
நற்றமிழின் பெயராலே பாட்டென
வார்த்தெடுத்தல் முறையாமோ
கற்ற தமிழால் பெற்றாளை
பேணி வளர்த்தாளை உற்றாளை
உடன்பிறந்தாளை பாடுமோ
உம்பேனா இவ்வகையில்.
இலக்கண வட்டிலில் அழகாய்
அடுக்கிய சொற்களெலாம்
கண்சிமிட்டி அழைக்க உவப்பில்லா
உருவப்படம் சேர்க்கின்றீர்
கண்ட பின்னே தெரிகிறது
ஆகாத இனிப்பு அஃதென்று
தமிழும் தலைக்குனியும்அறியீரோ
பெண்ணிங்கே போகப்பொருளோ
காட்சிக்கு வைக்கும் காண்பொருளோ
வெகுண்டு எழும் பெண் யாரும் இலரோ?
காமத்துபால் எங்களுக்கு ஒன்றும்
கசப்பில்லைக் காண் என்றாலும்
வள்ளுவனின் மூன்றாம்பாலென
இலைமறையாய் தந்திட்டால்
பொதுமறையாய் ஆகிவிடும்.

-கோ.லீலா